Vadderot (Phyteuma spicatum)

Vadderot er ei ganske sjeldsynt plante som veks like sør-aust for hovudbygningen på Rosendal. Den veks innimellom bregner, buskar og tre, og er såleis ikkje så lett å oppdage. Den står ikkje oppført i gamle rekneskapar eller frøtingingar. Det tyder på at den ikkje har vore kjøpt inn til renessansehagen, men den kan ha kome inn med grasfrøblandingar då landskapsparken vart forma. Kanskje kom den til hagen ein gong på 1800-talet?

Vadderot har truleg ikkje vore nytta som matplante på baroniet, men andre stader har den vore hausta for den kraftige og næringsrike rota.

Botanisk omtale

Vadderot (Phyteuma spicatum) høyrer til klokkefamilien (Campanulaceae). Planta har ein liten bladrosett, og opp frå bladrosetten kjem ein stengel som kan vera 50 cm høg. Dei gråkvita blomane sit tett saman i toppen.