Rosendal, Hardanger og Folgefonnhalvøya

Breføring på Folgefonna
Botnabreen, Mauranger: Frå Rosendal tek det omlag 50min å køyre til enden av vegen. Frå vegen er det omlag 40 min gangtid før ein står ved brekanten og kan ta på breutstyret. Turen vidare er ei vakker verd av blåefargar og majestetisk fjell i enden av den tronge Øyresdalen. I lag med Juklavassbreen er dette ein av dei best tilgjengelege breeane i Noreg. For alle tilreisande og lokale - her er ein sjanse til å oppleva Botnabreen med blåis og flott utsikt. Turen og brefallet gjer at det er råd å tilpassa turen til alle typer aktivitetar. Klatring er mogleg samstundes som dei flate partia innbyr til familievennlege turar.
Fakta om folgefonna: Breisen, klimaet og geologien

Folgefonna Sommar Skisenter, Jondal
Folgefonn Sommar Skisenter ligg på nordsida av Folgefonna ca. 1200 m.o.h. Her er alt tilrettelagt for opplevelsesrike dagar med skitilbod for alle. Hugs veret skiftar raskt i høgfjellet. Ta difor også med varme klede.

Agatunet, Nå
Eitt av svært få attverande klyngetun i Norge. Klyngetuna var den norske varianten av den mellom-europeiske landsbyen; alle husa var samla i ei klynge, medan den fruktbare jorda og skogen omkring var inndelt i små teigar. Blant dei finn vi den unike Lagmannsstova frå 1250, det einaste bevarte "byhus" av sitt slag i landet. I det gjestfrie tunet finn gjestene kunstutstillingar, brukskunstutsal og ei unik draktsamling.

Hardanger Folkemuseum, Utne
Museet har sidan skipinga i 1911 teke vare på hus, gjenstandar og anna kulturhistorisk materiale frå bygdene kring Hardangerfjorden. Til museet høyrer ei mindre fiskerihistorisk samling. Hovudmuseet med administrasjonsbygg og utstillingar ligg på Utne 200 meter frå ferjeleiet. I friluftsmuseet på Utne har ein gjenskapt eit tradisjonelt klyngjetun frå tida føre utskiftinga på 1800-talet. Det eldste huset, ei årestove, er truleg frå 1200-talet. Her er elles hus i alle aldrar frå 1600-talet fram til tidleg på 1900-talet, alle med tidstypisk innreiing. Til friluftsmuseet høyrer elles: krambu, husmannsplass, ein gamal skifabrikk og kvernhus. I nausta ved sjøen er det fleire tradisjonelle hardangerbåtar: færing, seksæring, åttæring, tiæring, heksbåt og ein stor føringsbåt, ei såkalla "nautaferge". I museumsbygget på Utne er det skiftande utstillingar med kunst og kulturhistorisk innhald gjennom heile året. Permanentutstillingar: "Brudeferden i Hardanger", "Folkedrakt og draktutstyr", "Kvinna sitt arbeidsår", "Fruktdyrking", "Folkemusikk" m.fl. I utstillinga "Hardingar på sjøen" er det lagt særleg vekt på sjøfart, fiske og båtbygging.

Norsk Vasskraft- og Industristad-museum, Tyssedal
Omvisningar: Tysso I - Norges einaste freda kraftstasjon. Arbeiderbustader 1910 - 1950 i Folgefonngata - Odda sentrum. Skjeggedal med kraftanlegg, kulturminne og den monumentale Ringedalsdammen (1918).
Det blå landet er ein forteljing om korleis vatnet blir brukt frå fjell til hav. Sjå filmen som ikkje berre gjev deg kunnskap, men også ei flott filmoppleving. Biletspel med ulike tema (lysbileteprogram sette saman av lydeffektar, forteljing, musikk og bilete). Dei mest populære biletspela har kommentarar og sitat lesne av kjende skodespelarar. Ei oppleving både for barn og vaksne.

Rosendal Musikkfestival
Rosendal Musikkfestival vert arrangert siste helga i mai kvart år , og har markert seg som ein kvalitetsfestival med store nasjonale og internasjonale navn på plakaten. Folkefesten spenner frå parade i Skålagato til Nattjazz og kyrkjekonsertar.

Maurangerfjorden med Furebergsfossen.
Den ville, vakre Furebergsfossen ligg like ved riksvegen mellom Odda og Rosendal, og sender ein frisk dusj med krystallklårt brevatn over brua. Maurangerfjorden er ein vakker liten, trong fjordarm til Hardangerfjorden, og inst i fjorden, i Sundal, kan ein få auge på Bondhusbreen heilt nede frå fjorden.

Rødtunet, Uskedalen
Tunet omfattar våningshus med røyk- og lemstove, stabbur, smie, stall og kvern med utstyr og innbu som høyrer til. Namnet Rød betyr rudning; rydja gard frå mellomalderen (1200-talet). Det er fire jamnstore bruk på Rød. Bruka var gardar under Baroniet Rosendal. Leiglendingane fekk kjøpa gardane dei sat på kring 1930, dei aller siste så seint som på 50-talet. Frå gammalt av har bøndene på Rød hatt attåtnæring av ymse slag; mest fiske, jakt og fangst, notbruk, tønneproduksjon og fraktefart. Det var tre husmannsplassar under Rød. Ingen av dei høyrde til bruket der bygdetunet står.
Tunet ligg vakkert til med fritt utsyn over fjorden omkransa av gamle, freda eiketre.