Rosehagen

Slottet på Baroniet Rosendal vart oppført av den danske adelsmannen Ludvig Rosenkrantz og Karen Mowatt i 1660-åra. Hagen vart utforma samstundes, på det flate partiet vest for slottet, der det i dag ligg ein vakker rosehage. I arkivet til Baroniet Rosendal finst det rekneskapar som viser kva planter som var i hagen på 16- og 1700-talet. Renessansehagen hadde då ei blanding av pryd- og nyttevekstar. I dag er renessansehagen fylt med over 2000 roser.

Måleriet av Hans Sager frå rundt år 1700 syner at hagen var utforma i eit strengt formalisert parterre. Det var dyrkingsfelt, markerte av kantplanter og frukttre, og med grusgangar mellom felta. Måleriet syner og den kvitkalka muren som tidlegare gjekk rundt hagen og avgrensa han mot landskapet utanfor. I dag er hovudtrekka i utforminga av den gamle renessansehagen intakte, men det har vore store endringar i planteutvalet gjennom den over 300 år lange historia til hagen.

Rosendal Have

Den romantiske landskapsparken

Kjøken- og Urtehagen

Folgefonna Nasjonalpark

Kart over Baroniet Rosendal

Kart over Rosendal Have