Kulturopplevingar

Konsertar i Den Røde Sal

Den Røde Sal vart innreia i anledning prins Carl (seinare kong Carl XV av Sverige-Norge) sitt besøk på Rosendal sommaren 1856. Den vart prega av nyrokokko med rødt og gull, og veggene vart pryda av store måleri av kjende kunstnarar frå Nasjonalromantikken som Hans Gude og Morten Müller.

I Den Røde Sal finst også eit flott Pleyel- flygel frå 1860 som har vorte restaurert til konsertbruk. Baroniet Rosendal har lange musikktradisjonar, og kjende artistar og komponistar som t.d. Halfdan Kjerulf og Ole Bull har vitja slottet. Desse musikktradisjonane vert vidareført gjennom dei mange konertane på Baroniet Rosendal kvar sommar.

Vi er så heldige å få besøk av mange flotte artistar som held intimkonsertar i Den Røde Sal år etter år, på same måte som herskapet heldt huskonsertar for familie og vener i denne salen.

Konsertar og teater i Borggården

Borggården framstår slik den gjorde i 1665, bortsett frå at den gamle eikeporten er erstatta med ein vakker smijernsport. Kvar sommar får Baroniet Rosendal besøk av Theatre Set-Up frå London som spelar Shakespeare på historiske stader over heile Europa. Historiske stader vert nytta som kulissar, og det vert lagt vekt på flotte renessansekostymar. Baroniet Rosendal er den einaste spelestaden i Noreg. Stykka vert framførte på engelsk, men dyktige skodespelarar og god akustikk gjer at publikum ikkje har problem å få med seg dialogane.

Også større konsertar og foredrag vert arrangert i Borggården. Dersom fare for regn vert det trekt tak over Borggården slik at publikum får sitja tørt.

Kunstutstillingar i Vinkjellaren

Etablering av kunstgalleri i slottet sin vinkjellar er ei vidareføring av tradisjonar og ei interesse for biletkunst som til alle tider har vore levande på Baroniet Rosendal. Fleire av dei største kunstnarane på 1800-talet vitja Baroniet Rosendal og Stamherre Marcus Gerhard Hoff Rosenkrone (1823-1896), som hadde ei stor interesse for samtidskunst. Dette er ein sterk tradisjon som vi gjerne vil vidareføra.

Sidan galleriet opna i 1990, har vi stort sett kvart år hatt ei samtidsutstilling på våren og deretter ei større historisk utstilling på sommaren. Dei historiske kunstutstillingane knyter seg til kunstnarar som frå før er representert i Baroniet Rosendals målerisamling eller på andre måtar var knytte til godset. Til kvar av desse utstillingane har Baroniet Rosendal produsert omfattande utstillingskatalogar for sal.

Vinkjellaren på 1600- tals slottet er eit særprega kunstutstillingslokale med dei originale 1600-tals kvelvingane i taket.